Зилпlипlи - 27 Августа 2017 - Колонка автора

	путь дарго	Джан дерхъаб! Гlямру дерхъаб! Воскресенье, 22.12.2024, 16:54
	Колонка автора	Приветствую Вас гость \| RSS

Главная » » Зилпlипlи

13:46

Зилпlипlи

Верхlал дубулла, верхlал къадала
Итшягlиб либли буили саби
Хlархьабирули ца ше дублишиб
Ада-абара, иштlал уршира.

Урши сикъелла "Зилпlипlи" или
Далай икlули вашни багьандан
Сунис либлелла Зилпlипlи бикlул
У абихьили буили саби.

Аба дашули дуули сари
Кьар бирдис вацlа-кьадализирад.
Варх Зилпlипlира ихьани сайри
Някъ хьабуцили, ахlитяхъисли.

Гьачам барх кlвелла ца дякь буцили
Аркьвял замана джагол хъалира,
Алав буцибил гlинцби-хъвярбела
Ца гlяхlна анхъра къаршидихьилли.

Аба дикlули сари: - Ва дила
Ахlарил урши, си билахьалли
Хlу гьих Вагьигла анхълизи вари
Я хъулли алав кицмайруд, - или.

Ца бархlи аба гlилар датулли,
Сунила сайцун хъули ливкьяли
Урши баягъи Вагьигла хъайчу
Дураитухъуй сай вархьизулли.

Хlярилишивхьад тясхьавхъуй урши
Эрхуй галгала бегlла хъаллиши,
Ца къяббякьили гlинц сай букули
Кlвиисил шалкlу дигlян бикьули.

Гlинцба луцlули галгала шидив
Ливли Зилпlипlи чарбили саби
Хъа дагl Вагьигра, гьилгъуна вайго
Патlинчяй бикlул сунна рурсира.

- Хlула абас ват, дила мукьара.
Силикьулле, гъариб, гьилкlу эрхулли? -
Или лявхьдухъуй сари уршилис
Вагьиг, бигули сай иргlяхьаргис.

- Велахlинна, ливра, гlинцба укули, –
Джаваб къантбякьили саби уршили,
Хlянчlбикlул мухlли тlашахlаили.

- Гьари-гори хlула абасра ца гlинц
Бакlихъагори, дахъ хьулдиллану, -
Или гъай гlурра малхlям дякьили
Сари гlямултар духъна Вагьигли.

Гlинцлиши или зузихьибхlили
Вагьигли галга гьакlарбякьили
Гавлагла ухlна увяхlушили
Хъар бигьуй арухиб сунила хъули.

Рурсира сарра алавбакlили
Урши шанглизи лайхьавакlили
Шанг шебизулли саби цlалиши,
Ца холал кибхьа шидибихьили.

- Вари хlардикlвин цlа ахlбяхlяхъяс, -
Или датулли сунила рурси
Вагьиг ардикьвяй сари урцуйши.

Ца ургаб шангла бухlнабад тlама
Дурабихьили саби далайла

- Гьай-гlяйиб дила, Зилпlипlи-пlи,
Дигlяндякьибти, Зилпlипlи-пlи,
Арцла ваяхlра, Зилпlипlи-пlи,
Дахъал мургьира, Зилпlипlи-пlи,
Мурт бихьисара, Зилпlипlи-пlи,
Укьяс хlаркlлигlи, Зилпlипlи-пlи…

Аргъис бигули кудил мусанир
Саррел мургьи-арц дигlян дякьибти,
Патlинчяй ахъли дикlули сари:

- Хlябра джаголи далай икlули
Хlу ливри кьалли. Гьари гьачамгlи
Тlама дакьари, вел аргъирану.

- Джаголи аргъис бигули дедли,
Шангла шидибил кибхьа убаса.

Ца-бара кибхьа гьаргабякьили
Рурсили лихlби дингдатуллири.

- Зилпlипlи, - или бара аргъисли
Гlуррара гlвяхьли далай или сай.

- Вел иргъуллану, ахълион аго!

- Джаголи аргъис бигули дедли
Гlурра ца камил кибхьа гьаргбакьа.

Рурсили кибхьа абкили сабиго,
- Зилпlипlи-пlипlи! - или вявъили
Дуцили Патlинчяй зузхьадякьили
Шангла духlнарад дагьар дякьили
Сай тясъонхьавхъуй дуравхъуй сай
Шанглиши кибхьа шибитихьили
Сай хъалши эрхуй дигlянили сай.

Вайгlир гушдили Вагьиг чардили
Сари урцуйчол, мах гlиляхъили.
Каниралла сунна рурси агули
Диргули сари: - Хlула твяlхми дургl!
Гьиш рурси кани чара дикlоне?!
Бурибил гlягlни сен ахlбикьане?!
Хlула гlямал буъ, чуъна икlоне?!

Вагьигли шангла кибхьа абкили
Холтlдухъуй сари шанглизи кошичол
Бакlили саби билхьунил някъ.

- Хlябилла дила Патlинчяйлайши
Мишуран някъ ахlбели, - или,
Ташмиш дилиго, амма сунила
Дахъ гушдибдишли биркуй сари.

Ахlдилкъуй гlурра холтlдухъуй сари
Бакlихъили тlвяхl, биркуй сари.

- Хlябилла дила Патlинчяйлайши
Мишуран тlвяхl либри кьалли, -
Или гlуррара ташмиш дилли
Хахамдухъуйго бакlили саби
Гъизба бицlибил Патlинчяйла бикl.

Дахlдили сари Вагьиг чlярдикlис
- Ва гьуя дила, бегlлара джагол!
Бегlлара духул! Ахlарил рурси!
Сен гьилъой джявли гъу алхунилле?
Сен нуцун хьалъуй хlу дибкlибилле?

Хапли хъалшибад "Зилпlипlи" - или
Тlама аргъили сари Вагьигли,
Амма кудадал багьулли ахlин.

- Канивре урши? Ваши абачу, -
Или лявхьдухъуй сари гlуррара.

- Хъалшивра. Ливра авруша биркис
Хlядур икlули, - джаваб битхьилли.

- Силикьулле гьилкlув, хlула абас ват,
Увяхlхьяхъиго. Тlималла багьихъис
Абасра бихану авруша кесек.

- Авруша бигадли, хlулби гlикlили,
Мухlли гьаргбакьа, лайхьабикlусну

Буриб тяхlялли, хlулби гlикlили,
Мухlли абкили сари Вагьигли.
Авруша кьякь лайхьабакlили
Саби Вагьигла дубша тяп бархьли.

- Хlябилла бидзил либри кьалли
Гlур агув? Бихаго, - дикlули сари.

- Сен агорила, либ холал бегlе.
Холал бигали хlуни дируйгlиб
Мухlли гьаргбакьа, хlулби гlикlили,

Вагьигли мухlли аъхьабяхъялли,
Уршили асили пичла кьяпlила
Мякьлибад цlаон бимджурил хlункъа
Вагьигла кьаклизи ивгьили саби.

Буцlарил хlункъа арбикьвяй койзи
Вагьиг гьитсягlят дибкlили сари.

Гьилсягlят гьилкlу чула урши
Иттяхъибхlили къяйцlхьабикlути
Ада-абара бакlили саби.
Гlур барх либилла арбикьвяй чула
Хъайгlи разили хьурахьабилли.

Гьанахlара тиб хlархьабирули.
Нура икьвянна, аврушалира
Гlинцби-хъярбара укуй илкъунна
Хlушази бурис бигули далай
Зилпlипlиини бучlул билкlунна:

Зилпlипlи-пlипlи, бум,
Зилпlипlи-пlипlи, дум,
Зилпlипlи-пlипlи, бум-бум,
Зилпlипlи-пlипlи. дум-дум,
Зилпlипlи-пlипlи, пlиииииии.