 | |  |
| |
|
Верхlал дубулла, верхlал урхьула
Итшягlиб либли буили саби
Ца ше дублишиб амъур ше гlинидз
Либилла ше халкь шин гlяхъяс башул.
Ца ургаб хапли багьари били
Хlябал бикlла багl вайна аждагьа
Шихьабуцили баягъи гlинидз
Валтули ахlин кицихъис чалла.
Агули шин чус гlяхъясил муса
Мулъули бубкlули саби либилла
Гьуябикlули биштlа-холати,
Хьунул-дурхlяра, бухъна-хъияра.
Шилизиб либти бегlла чlумъати
Бегlла къуватти гъубзни дявличол
Дурабухъуйри аждагьаличол
Амма бажарди ахlилли цалла.
Арбикьяй саби гlяхlна замана.
Акlуй сай шилизив ца иштlал гъобза.
Дуги-хlирехlъили усра усулли
Хlяблис кьадин укра укулли.
Гьар дуги дигlяй гlиндзи вашули
Дурхъати шера уджули сайра
Царилти дурхlнион дусмаши ахlи
Хола икlулли гьар сягlятлиши.
Сунила къугъни, халкьла гlязабти
Шидиухlили гьимидулхъули
Хъви бякьили сай никlа гъобзали
Гlинидз батихъис аждагьализи.
Дисули сари, гьуядикlули
Адай: "Ва дила ахlарил урши
Хlу махlуриллиб, кани аркьвялле?
Хlу ахlукьядли холати камлиб?"
Лихlахlизули адайла гъайлиши
Дураухъуй сай гlяхlгъобза урши
Ватихьили аили сай гlинидзличу
Бусули баргили саби аждагьа.
Занкlухъуй сай, шибаргъихъис.
Гlясси били саби аждагьа.
Гавлира цlалира тlутlубикlули
Вайна тlамали бикlули саби:
- Хъяша, баллулив, кани вакlиллел?!
Пикри ухъадив занкlухъис гьалав?
Хlушибра чlумъати, цlакьти, къуватти
Чум гъобза алхуял гьешкlуб балуллив?
- Лирилла далукъе вакlибилла ну, -
Икlули сай урши, урухахlили.
- Халкьлиширти хlула гудж-зулму урасис,
Гlинидзла ари халкьлизи битхьис.
Гlяксабикlули саби аждагьа:
- Хъяшначу дявли дураухъасли
Халкь дукаркlули мучлахlбикьура
Ахlбирус хlучу ну дявта бикьис.
Гьари цараон ваши джал арзис:
Рахли дила хlябал суаллис
Джаваб гис хlуни ахlедли багьи
Хьавшили хlура угайри нуни.
- Гlяхlна, - или кьабулихьиб урши.
- Цаисил суал гьишгъуна саби:
Гьари бура бегlла муръил си сабел?
Бусул замана шибаргъихъибил
Аждагьала сион джунджри дакlибал
Шибаибил урши икlули сай:
- Баласра, бегlла муръил гьанкl саби.
"Сион гьамадли багьура" - или,
Уркlхьабухъунил аждагьала бикl
Дикlархьабили гирбухъуй саби.
Амма мукlур бакlили ахlин:
- Кlвиисил суал саби гьишгъуна:
Бура си сабел бегlлара кlантlил?
"Ахlбалас" или ис ахlирули
Пашманни, сунна адайла гъайра,
Гьархlили лявикьул адайла някъра
Гьандихьили хапли, икlули сай:
- Бегlла кантlити - адайла някъби!
Цагlи бикl къяббили къада-къадахьад
Гирбухъуй саби. Кlвел бикl агули
Джан адурхули, усал бихьибил
Аждагьа бара бикlули саби:
- Си сабел бегlлара хъярхъил баладу?
Гьаларти суалти къийн духъунил
Замана сион лирилла сикlал
Гьамдихьибил пикри бякьили
- Баласра, - икlули сай джагьил гъобза.
- Бегlлара хъярхъил - адамъэ пикри!
Уршили гьилди гъай дурибичу
Хlябъисил бикlра дикlарабили
Къада-къадахьад гирхьабухъуйри.
Барх аждагьара бибкlили гвирбизур.
Чус чула гlинидз бихьили или
Хlинна бикьули разили тибри
Букули буджули шилизиб шанти.
Нура икьвяй ши уджуй вакlира.
|
|
Категория: камни |
Просмотров: 1064 |
Добавил: дарго
| Теги:
| Рейтинг: 5.0/3 |
Добавлять комментарии могут только зарегистрированные пользователи. [ Регистрация | Вход ] | |
 | |  |
|
| Наш опрос |
Включить в список нематериального культурного наследия ЮНЕСКО
Всего ответов: 25
|
| Статистика |
Онлайн всего: 4 Гостей: 4 Пользователей: 0 |
|
