 | |  |
| |
|
Сунна сягlят бакlили арикьвян гlяхlна гъобза,
Агухlили акlунил ахlибкlис цалла инсан.
Сунила бунагь-хатlа урхьадуцаб Аллагьли.
Нушара дубкlантира сягlят сабаибхlили.
Хlушачу вакlибилла дилара дицl багьихъис,
Хlушачу дарх дилара пашмандиш цахlнар дихъис.
Арадеба лирилла гlилар хьалъунти хlуша,
Кьадар бакlибхlили я гlяхlлишицун дашаба.
***
Аллагьла кьадар или ушидирхьулла нуша
Бархьа саби, цацунил Аллагьла сари дунья
Сикъелла канивалла лив сай, акlунил ахlин,
Я убкlани. Суничу агу чалла аисил.
Ахlарти удзби-рудзби, гlяйиб бякьис, суд бякьис
Къалаба мадикlуда, амма пикридухъина:
Аллагьла кьадар ахlин улхlли ламарт бякьили
Хьавшали гlяхlна гъобза – гьил усал хlянки саби.
Сунис насибил ахlин хапли хабар агули
Дзугlяла битагьулли - машина къячlбихьили,
Я идзлума уцили - джагьли ливалли инсан
Арукьяли цlяб хlвяри – гьил вайна хатlа саби.
Аллагьла кьадар саби акlнилиши разили
Сунис дитхьибти гlвямру диркlили хlиннайкьули,
Хьуно дигай дагьулли, биштlа дурхlнелайгьили,
Хъали-цlа адикьулли, ибкlис ухъна ваили.
Амма сигъуна гьуни дуцили сай вашарал,
Бигухъу сунизибад, алавчар халкьлизибад.
Гьилбагьандан дурхlнази бурули аргъихъая,
Духули шишбикlвихъис, хатlа-дзугlялахlбихъис.
Хlушара пикридухъуй дея шихьадизулли
Мяхlкамдикlвина вари арадиш либилцадхlе.
Идзлуми дахъдаали тухтуртаанна холал
Кумек бигулихьалли бякьис биранти ахlин.
«Аллагь! Аллагь!» - икlули, вагlли къайгъехlбакьали,
Духули ва мяхlкамли сай вагl шишахlикlоли,
Шивлукlа, Аллагьлира уркlицlи камли бикьу.
Бели вагlла хlяракат Аллагьра икьалайрар.
Гьалжана агьлулизи сай хьалтани балгали
Ва гlяхlна баркьудили. Бунагь-хатlалиширад
Ширдирхулли хlяб-хlябал уркlи-уркlилиширад
Балга дякьили хlялал ватира арикьвянил.
***
Сунна сягlят бакlили арикьвян гlяхlна гъобза,
Агухlили акlунил ахlибкlис цалла инсан.
Сунила бунагь-хатlа урхьадуцаб цlяб хlвяри.
Нушара дубкlантира сягlят сабаибхlили.
Хlушачу вакlибилла дилара дицl багьихъис
Хlушачу дарх дилара пашмандиш цахlнар дихъис.
Арадеба лирилла гlилар хьалъунти хlуша
Кьадар бакlибхlили я гlяхlлишицун дашаба.
|
|
Категория: камни |
Просмотров: 756 |
Добавил: дарго_магомед
| Теги:
| Рейтинг: 5.0/2 |
Добавлять комментарии могут только зарегистрированные пользователи. [ Регистрация | Вход ] | |
 | |  |
|
| Наш опрос |
Верите ли Вы в гороскопы?
Всего ответов: 84
|
| Календарь |
| « Февраль 2019 » |
| Пн |
Вт |
Ср |
Чт |
Пт |
Сб |
Вс |
| | | | | 1 | 2 | 3 | | 4 | 5 | 6 | 7 | 8 | 9 | 10 | | 11 | 12 | 13 | 14 | 15 | 16 | 17 | | 18 | 19 | 20 | 21 | 22 | 23 | 24 | | 25 | 26 | 27 | 28 | |
| Статистика |
Онлайн всего: 1 Гостей: 1 Пользователей: 0 |
|
